“Sud, si’ terra amara, addo’ ’e mamme s’astregneno ’e cuorpe d’ ’e figlie accise da ’e cénnere c’ ’o tuòsseco, addo’ ’e strille loro so’ inutile e ’o dulore rummane sempe surdo.
Sud, si’ terra amara, addo’ l’uommene forte addeventano fùcete, scamazzate da ’o putere ’e chi ’e vo’ muorte ’e famme.
Sud, si’ terra amara, addo’ ’a vita è ’nu sciuscio e manco ’nu suonno ’nzuonno te fanno rializza’.
Sud, si’ terra amara, addo’ ’o primmo che passa penza ’e tene’ ’o diritto ’e sputazzarte ’nfaccia, chiamànnote «ommo spuorco d’ ’o Sud», «’nfamone», «mariuolo», «cammurrista».
Sud, si’ terra amara, addo’ nun s’abbada a chi tene ’e ’n’atu culore ’a pella: nuie cà tenimmo mente sulo a comme passano da ’nu culore a ’n’ato ’e ferze ’e l’arcobaleno.
Sud, tu terra amara si’, furzata a fa’ emigra’ ’sti figlie tuoie, comm’ a rénnene, ma addo’ l’aria è de iaccio, e ’o core è tutt’asprezza.
Sud, tu terra amara si’, addo’ l’uommene oneste so’ mariuole e l’ancine so’ tutte galantomme, terra amara, messa ’ncroce, ’nzurtata dint’ ’o cuorpo, terra odiata, scurnata, appicciata, cuffiata sempe e ’n’ata vota ancora da ’na Storia fàveza, struppiata, ’mbrugliata pe’ ’mbrugliarce.
Terra mia, ’o sole ’n’ata vota scarfarrà chesti scampíe; ’a vita sguigliarà dint’ ’e vallate, pe’ ’e chiane generose, l’allerezza d’ ’e ninne, ’a ’nnustriusità d’ ’a gente; addo’ ’e suonne sarranno ’n’ata vota speranza e ’a speranza putarrà nun essere inutile, pecché l’uommene aizarranno ’a faccia e chiù nun ce sarrà quacche sputazza ch’ ’a putarrà maie cogliere, nun chiù ’nu sfreggio che putarrà senti’, nun chiù ’na gnurantezza ch’ ’a putarrà ’nzurta’.
Terra mia, chello ch’è stato maie chiù riturnarrà”.
Brigantessa Vittoria Longo
