Ricerca e elaborazione testi del Prof.Renato Rinaldi Da: “Lu Trovatore” Giornale-Spassiatiempo- gennaio 1866
LE SPERANZE DE NO POPOLO
Napule s’era addormuto ncoppa a lu penziero de la liberta. Doppo lo 15 maggio 48 la Costetuzione s’nn’erajuta doce doce a fa friJere, e lu popolo tirava nnante la vita comme Voleva Dio, e si non era felice, contento e foculialo, era a lo mmanco lo popolo che magnava chello ppoco che poteva co le fatiche soie, e guardava la politeca de lu paese comm a merce de contrabanno.
Alllora si nquarche ghiuorno se scetava e cercava de volé sape lo comme e lo quanno ascevano Campagna e Ajossa ‘ntridece, e bonanotte a Cola, chi se faceva lo fatto sujo tornava a la casa soja la sera, e chi no lo portavano groliuso e trionfante dint a le quarantaquatto.
Ma nu jurno , pe disgrazia nosta, se dicette ch’era asciuto lo sole. Era la matina de lu 25 Giugno, Napole aveva pe la seconna vota la felicità de chella carta, che pe quanto sole darese chiena de doce prumesse, a lo ccontra la soleno astipa pe ll’uso conveniente ! E de fatto, trovateme da che munno é munno no solo articolo de no Statuto che fosse juto nnante, e boglio perdere n’ uocchio…. de Don Quintino Sella, si dico la buscia,
La parola Costituzione a li tiempe che correno sa da tradurre: Coglionazione, senza né spina, né uosso.
Lo governo de la negazione de Dio, s’era scetato costituzionale, aveva capito, no poco troppo tardo, la volonta de lu paese, e s’era miso ncoppa a la bona via. Ma la setta de li cammurristes aveva chiavato ncapo de non volé sapé niente de le promesse soje – e p’arrobba a larga mano se jette trovanno nautro masto de cappella, non mporta po si la museca fosse o non fosse stata la stessa !!
Cheste so cose vecchie che tutte quante nce’ avimmo da ricorda, si non autro pe rinfrisca la memoria.
Quanno uno è canosciuto dint a lu paese sujo pe bammeniello de primm ‘aletto, va trovanno sempe de fa l’affare suoje fore paese, addo non è canosciuto. E accussi succedette; la Camorra, la Conzortaria, che simbé sparpagliata tanno era sempe la stessa ricorrette a le ggrazie de lu Piamonte, e lle cercaje ngrazia de farle lu piacere venirece a governa isso. E lu mmitato corrette, e non se lo facette di la seconna vota,anze lu poveriello nce’ajutaje co arme e denaro, e facette a nuje povere gnorante chella sorta de careta che solimmo chiamma caretà pelosa!
E che ve pare? Si vuje fussevo no povero disperato senza né scarpe e né soprabbeto co lo grasso ncoppa a lu “bavero de lu vestito ca ve zompa nfaccia, co la panza che s’ave da contenta de chello poco che lle se po da, e avissevo lo mmito de na tavola sfarzosa, addo lo magna se jetta pe la fenesta, e le piatanze song una meglio dell’autre, e li figlie de famiglia che la danno, sguazzune all’urdemo eccesso, so canosciute da tutto lo munno pe lo core d’acqua che teneno; diciteme non nce corrarrissevo a chisto mmito purzi maneca e ncammisa? Nuje trionfajemo, zzoé li birbante co la patente pigliajeno le rretene de lo Stato, e la varca nova costruita lo cielo sape a qua paese scommunecato accommenzaje a cammenà ripa ripa, prometienno quanto primmo de pigliare lu llario.
Napole ch’ e nato ciuccio, campa da bestia, e morarra animale se mmoccaje lu gnuoccolo, e gliette a sbattere le mmane, e facette comm’a lu cane de la favola che co lo piezzo de carne mmocca passava pe vicino a lu sciummo.
Quanta promesse, quanta lacreme de tennerezze, quanta vivò non se so fatte e ghiettate all’aria, quant’uoglio non avimmo strutto a lu semplice annunzio d’allumate, stutate, cacciate le bannere, s’é pigliato Proceta, é asciuto prieno lu sinneco d’Isca !
E comm’ a tanta portelappascere simmo corrute co la vocca aperta, nce avimmo fatto portà pe lo naso, e simme cadute mbriache de la pazzia, comm’a chi se retira stracqu’e strutto da no festino de la mezzanotte.
Mme sapissevo a di le speranze noste addo so ghiute a cadé co lu ciuccio ?
Sti frate consuprine che nce proponevano la santa libberta pe levarece da la schiavitù, sapesseno a direce qual é stato lu bene ch’anno portato a la popolazione ch’aspetta?
Si ajere stevamo paccariate, ogge nce morimmo de la santissema famma !
Si aiere eramo governate malamente, ogge lo simmo peggio assaie, anze barbaramente, e si nce fosse no vocabolo cchiù brutto de lu barbarisemo sarria pure poco a paragone de chello che se soffre ! 22 miliune d’anime so state tradute e bennute da 22, cchiu o meno, camnorriste proprietarie ; e le sostanze de tanta povere figlie de mamma traseno mpossesso de na vranca de fetiente che se li hanno a niuzià accattannosenne case e massarie a Llondra e a la Sguizzera !
E le speranze de lo popolo nuosto restaieno sempe speranze de no povero paccariato.
Avimmo avuto la libberta, che a llengua latina se chiamma libertas, e siconno la traduzione de no chianchiero liber… tas , zzoé lu libbero de le ttasse. E nce pare poco ?
Mo se n’é benuto lo matremmoio civile, la tassa ncoppa a le pporte e feneste, e a li muline; ma de chesto ne parlarrammo a li nummere venture.
LU Trovatore
