‘A VEPPETA D’ACQUA…….FERDINANDO RUSSO
Chisto è ‘o cunto d’’a veppeta d’acqua
mmiezo ‘a via d’’a Funtana Affatata,
addò mmano ê tiempe ‘e na fata
nce murette d’ammore nu Rre.
‘O zampillo pareva ‘e brillante
pe stu sole ca justo nce deva,
e, guardanno ‘a funtana pareva
nu tesoro ‘e brillante ‘e vedè!
Na matina, ‘o Rre de stu cunto,
sulo sulo passava a ccavallo;
se senteva luntano nu gallo
e na stella tardava a sparì.
D’’a funtana partette na voce :
“ Bellu Rre, ma pecchè nun scennite?
P’’o cammino che fatto già avite,
nun sentite mo ‘a sete ‘e venì?”
“ Tengo sete, ma è sete d’ammore,
funtanella e ‘a frischezza che tiene
nun abbasta a ssanà tutt’’e ppene
che ‘o Destino m’ha fatto pruvà!
So’ tre anne, tre mise e tre ghiuorne
ca na spina int’’o core fa sanghe,
ca sti gamme e sti bbracce so’ stanche
e chist’uocchie se stanno a abbruscià!”
“ Bellu Rre, mo, scennite e li llabbre
accustate a chest’acqua ca è ddoce..
rispunnette de ll’acqua na voce,
‘a Funtana Affatata chest’è !
Cca na vota vevette Rinaldo,
tutt’ammore p’Angelica ‘a bella,
cca na vota scennette d’’a sella
Bradamante e se sape ‘o pecchè!
E si Angelica aveva vevuto
a chell’ata funtana malegna,
addò ‘a Fata d’’o mmale ce regna,
‘o Destino vulette accussì!”
Ncielo ‘a stella se n’era trasuta,
ma stu gallo che ancora cantava,
pe tramenta ca ‘o Rre s’accustava,
suspennette nu chicchirichì.
Nun vulava pe ll’aria n’arillo,
nun passava na refola ‘e viento,
sulamente luceva ll’argiento
ncopp’’a bell’armatura d’’o Rre,
che accustanno sti labbr’a funtana
se facette cchiù janco d’’a cera,
po cadette e da sott’’a visiera
nzerraje ll’uocchie pe maje cchiù vedè.
Chist’è ‘o cunto d’’a veppeta d’acqua
mmiez’a via d’’a Funtana Affatata;
i’, p’averla surtanto guardata
sto murenno d’ammore pe tte!!
FERDINANDO RUSSO
Posted by altaterradilavoro on Apr 8, 2018
fonte
http://pulcinella291.forumfree.it/?t=75508460